薛凯琪，香港歌手。渠喺香港出世，籍贯广东中山，中学就读港岛学校，大学就读香港城市大学创意媒体学院。起初参与拍摄多个广告同埋做杂志模特儿，及后毕业投身娱乐界。2003年，加入华纳唱片公司，其后相继推出派台歌曲《XBF》、《麦当娜一吻》、《奇洛李维斯回信》、《上帝是男孩》。 2004年4月8号推出第一张大碟《F Debut》。同年5月5号，因为《F Debut》销量创佳绩，所以推出《F Debut AVCD》，当中收录咗《奇洛李维斯回信》嘅特别版《奇洛李维斯回信(真的回信了)》(同郭富城合唱)以及多首歌曲嘅MV。 其后，更获得金唱片(25,000张)嘅成绩。 2004年，渠喺四大乐坛颁奖礼获得当年女新人之中最好嘅成绩，总共八个奖。其中喺叱咤乐坛流行榜颁奖典礼更凭「奇洛李维斯回信」一曲打败乐坛唔少旧人，获得专业推介、叱咤十大(第七位)。其后喺IFPI香港唱片销量大奖中获「最畅销本地女新人」殊荣。